Mga Mensahe, Unawain

Habang umuusad ang ating panahon at nagiging mas makabago pa ang teknolohiya ng tao, sumasabay pa rin sa pagbabagong ito ang aspekto ng ating espiritwal at dumarami na ngayon ang mga nakakaranas ng mga kababalaghan sa kanilang buhay na kahit na balewalain natin ay nandyan pa rin.

Ang tinutukoy ko ay hindi lamang ang pagpaparamdam at pagpapakita ng mga espiritu sa ating pang-araw araw na buhay, kundi maging ang mga kaganapan sa ating buhay na palagi nating isinasaisip na nagkataon lamang.

Ang ganitong mga kaganapan itanggi man natin sa hindi ay resulta ng ating sariling kagustuhan sa pamamagitan ng ating isipan, bagaman ang iba ay biglang dumarating sa ating buhay na ni minsan ay hindi naman naisip na mangyari.

Para sa karamihan, sadyang mahiwaga ang buhay natin sa mundong ito, ngunit kung lilimiin nating mabuti, lahat ng mga nagaganap sa ating buhay ay merong magandang resulta sa ating buhay at kung bubuksan lamang natin ang ating isipan ay wala naman talaga misteryo o hiwaga sa buhay ng tao – lahat ay normal.

Kahit gaano pa kapangit o kasama sa paningin natin o sa tingin ng iba ang isang kaganapan ay makikita pa rin natin na meron itong magandang epekto sa ating buhay, kung kaya’t ang lagi kong paalala, tignan ang positibong epekto ng lahat.

Ang mga nilalang sa kabilang buhay o dimensiyon, kaluluwa man yan, anghel man yan, engkanto at ekstra-terestriyal, lahat ng mga espiritu ay merong mga mensahe sa atin ngunit depende yan sa kundisyon ng ating kaisipan.

Kung ang kundisyon ng ating puso’t isipan ay nakatuon sa pangit na pananaw ng buhay ay negatibong pwersa ang lalapit sa iyong buhay na ang resulta ay masamang kapalaran, ngunit, kung positibo at magagandang layunin ang laging naiisip sa kabila ng mga sakripisyo at paghihirap ay tiyak na merong magandang kinabukasan na patutunguhan, ito ang kasabihan na “like attracts likes.”.

Kaya’t mahalagang maging sensitibo tayo, talasan ang ating pakiramdam, paningin at isipan sa anumang mga mensahe na dumarating sa ating buhay, lahat ng yan ay merong mahalagang papel sa ating buhay.







Tulad na lamang ng pakikipag-ugnayan natin sa Poong Maykapal, karamihan sa atin ay nagdarasal laging humihingi ng tawad at pagpapala sa Diyos, at laging naghihintay ng katugunan mula sa Kanya.

Karamihan ay nais na makita ng mga mata natin kung ano ang katugunan mula Diyos “to see is to believe” ika nga, ngunit sa totoo lang nung oras na ikaw ay nanalangin at nakipag-ugnayan sa Kanya ay meron na agad Siyang katugunan.

Sa unang pagkakataon kapag hindi mo naunawaan ang mensahe ay hindi titigil ang Diyos sa pagsasabi sayo ng Kanyang katugunan, hanggang sa umabot sa puntong maunawaan mo na.

Naranasan niyo bang isang araw may wish kayo ay bigla niyo na lamang nakita ang katugunan sa inyong kahilingan habang kayo ay naglalakad sa kalye, at kitang kita ng dalawa mong mga mata ang napakalaking kataga o di man kaya ay paulit-ulit mong naririnig ang mensahe mula na mismo sa mga taong nakapaligid sayo.

Kung kaya’t ang lagi kong sinasabi na kapag nanalangin tayo sa Poong Maykapal ay magpasalamat na tayo dahil “affirmation” na yun kumbaga ay tinanggap na natin ang naging katugunan Niya sa ating kahilingan, ngunit kadalasan sa maraming pagkakataon ay nababalam ang katuparan ng lahat, marahil sayo din ang problema tulad ng pagdududa at mga maling desisyon.

Mahalagang pakinggan natin ang mensahe hindi lamang mula sa Diyos kundi maging ng iba pang nilalang na makatutulong sa atin, basta magtiwala lamang tayo sa ating sariling kakayanan, ngunit kahit na madapa man tayo sa landas na ating tinatahak ay marami pang pagkakataon sa ating buhay – MANALIG LAMANG TAYO!

Para sa inyong mga katanungan at suhestyun, mag-text sa 09286209127. Mag-email sa misteryolohika@gmail.com. Bisitahin ang aking website http://misteryolohika.tripod.com/.#

Pagsabog sa Glorietta, Nakita Bago Nangyari

Marami sa atin ang meron kakaibang kakayanan sa pag-iisip o mind power na maituturing na di-pangkaraniwan sa karamihan. Bagaman ang iba mula pagkabata ay kanilang natuklasan ang kanilang kakaibang abilidad tulad ng pagkakita sa mga mangyayari pa lamang na kilala sa tawag na “precognition”, ang iba naman ay kamakailan lamang nila natuklasan o dumating sa kanilang buhay.

Ngunit gusto kong linawin na ang bawat isa sa atin ay merong abilidad ngunit kung ano man ito ay depende sa antas ng ating kaisipan at kung ano ang maituturing nating naka-atang na tungkulin na dapat gampanan sa mundong ito.

Dahil dito, mawawala na ang luma nating paniniwala na ang mga maituturing nating pambihirang abilidad ay para lamang sa mga iilan na itinuturing din nating mga espesyal na nilalang sa mundong ito.

Sa totoo lamang lahat ng nilalang ng Panginoong Diyos ay espesyal sa Kanya kung kaya’t lahat ay mayrong espesyal na abilidad at tungkulin o misyon na dapat na maisagawa sa daigdig na ito.

Tulad na lamang ng abilidad na prekognisyon (precognition-halaw sa salitang latin “prae- prior to” at cognition “getting to know”), kung tatalasan lang natin ang ating pakiramdam at pag-iisip ay malalaman natin agad bagupaman mangyari ang isang insidente.

Ngunit dahil sa masyado tayong abala sa pang-araw-araw nating ginagawa lalu na sa usaping materyal ay hindi natin nagagamit ang ganitong abilidad kung kaya’t hindi natin nasasagap ang mga mensahe o impormasyon na maaaring makatulong sa atin at maligtas sa anumang kapahamakan.

Bagupaman nangyari ang pagsabog ng bomba sa isang mall sa Makati, tiyak kong marami sa atin ang nakasagap ng mga babala o mensahe ngunit iilan ang nakapakinig at naunawaan na ganito nga ang maaaring maganap.

Isang kababayan natin ang nagulat nang mangyari ang kakila-kilabot na trahedya sa Glorietta nang biglang sumambulat ang isang napakalakas na bomba na kumitil sa buhay at ikinasugat ng maraming inosenteng mamamayan.

Sa testimonya ng isa nating kababayan na itago natin sa pangalang Gemini, mga apat na linggo na ang lumipas nang bigla siyang managinip ng isang trahedya na hawig sa nangyaring pambobomba sa Glorietta Mall.

“Kitang-kita ko ang aking sarili sa isang mall na namamasyal nang bigla akong makarinig ng malakas na pagsabog at kasunod nito ang nakaririnding hiyawan, sigawan ng maraming tao at nag-uunahan na makalabas ng makipot na pintuan ng gusali. Nakita kong maraming tao kabilang na ang mga kabataan, at bata ang tila’y nakulong sa naturang pagsabog. Ang iba ay nag-iiyakan at humahagulgol sa sugat na kanilang tinamo samantalang ang iba naman ay nakahandusay na tila wala nang buhay. Hindi ko nakayanan ang aking nakita kung kaya’t ako ay umiiyak din hanggang sa ako ay magising. Laking pasalamat ko sa Diyos akala ko ay totoo yun pala ay panaginip lang. Ngunit nagulat na lamang ako na magkakatotoo ito sa tunay na buhay. May ilang mga malalapit na kaibigan akong nasabihan sa aking nakita sa panaginip ngunit ilan lamang sa kanila ang nakinig. ”

Maaaring ang karanasan ni Gemini ay naranasan din ng ibang sensitibong tao ngunit hindi lamang pinansin ang mensahe sa katwirang ito ay panaginip lamang o masamang pangitain. Ngunit sa kanyang panig bilang isang indibidwal ay meron siyang nasabihan bagaman hindi ito agad na pinaniwalaan hanggang sa mangyari ang kanyang nakita o napanaginipan sa katotohanan.

Ang lagi kong payo, anuman ang inyong makita sa inyong panaginip o bigla lang kayong naidlip at may nakita kayong pangyayari o insidente ay marapat na isulat ito lalu na pag malinaw na malinaw ang buong detalye ng anumang trahedya.

Para sa inyong mga katanungan at suhestyun, mag-text sa 09286209127. Mag-email sa misteryolohika@gmail.com. Bisitahin ang aking website http://misteryolohika.tripod.com.#

Sama ng Panahon O UFO?

Bilang isang mananaliksik ay gusto kong busisiin ang mga di-pangkaraniwang pangyayari tulad na lamang ng masasabi kong abnormal na biglang paglaki ng alon na sumira sa daan-daang kabahayan sa baybayin ng Occidental Mindoro, at tumama din sa mga dalampasigan ng Batangas at Cavite noong Oktubre 2, 2007.

Bagaman itinuturing ng mga kinauukulan na isang natural na pangyayari dulot ng kalikasan ang biglang pagtaas ng alon sa karagatan nung gabi ng Lunes, meron namang teyorya na posibleng merong kakaibang dahilan kung bakit ito nangyari – at ito nga ay posibleng pagbagsak ng Unidentified Flying Object o UFO.

Lingid sa ating kaalaman, di maiwasang mangyari ang ganitong insidente ng pagbagsak ng mga UFO sanhi ng manaka-nakang labanan sa dimensiyon ng mga ekstra-terestriyal.

Bagaman, may ganitong teyorya, minabuti nating makuha ang paliwanag ng mga siyentista tungkol dito at sinabi nila na ang biglang pagtaas ng alon ay dulot ng tinawag nilang “storm surge” o ang nagsalubong na pwersa ng bagyong Hannah at ang banta ng sama ng panahon ng bagyong Ineng.

Ngunit kung natural lamang na resulta ng sama ng panahon ang biglang paglaki ng alon ay nagtataka ang mga residenteng apektado sanhi ng wala namang malakas na bayo ng hangin o buhos ng ulan nang ito ay nangyari.

Madaming kabahayan sa Sta. Cruz, Occidental Mindoro ang nawasak nang salpukin ng malalaking alon mula sa karagatan na nakaapekto rin sa mga baybaying dagat sa Mamburao at mga karatig lugar, maging sa mga lugar sa mga lalawigan ng Batangas at Cavite.

Lubhang nagtataka ang mga residente kung bakit biglang tumaas ang alon samantalang wala namang nangyaring paglindol sa karagatan o di man kaya ay babala ng tsunami sa karagatan.

Ilan sa mga natanong kong mga sensitibong tao (psychics) at channels ang nagsabing posibleng may bumagsak nang kung anung bagay sa dagat na lumikha ng biglang paglaki ng alon, ngunit hindi rin ako agad naniniwala dito dahil sa kailangan ko pang suriing mabuti ang tunay na nangyari.





Bagaman, siyempre bilang isang ordinaryong mamamayan at hindi ko naman itinuturing ang sarili ko bilang otorisado na magdeklara ng anuman tungkol sa nangyari, ngunit alinsunod sa aking nakalap na impormasyon, maaaring UFO ang bumagsak sa bahaging iyon ng South China Sea malapit sa baybayin ng Occidental Mindoro, Cavite at Batangas.

Isang psychic na si Joyce ng Laguna ang natanong ko tungkol dito at ganito ang kanyang nakita nang sinikap niyang i-focus o remote viewing ang bahaging yun ng karagatan.

“Malakas ang current ng tubig pababa sa ilalim ng dagat. May kung anong pabilog na bagay ang nakita ko na parang yun ang cause ng current. Yun ang bumaba sa ilalim kaya nagkaroon ng current. May nakita akong parang ipu-ipo under the sea lagpas pa sa sea mantle sa pinakailalim ng lupa ng dagat dun pababa. Ipu-ipo palagay ko yung UFO ang nilamon ng dagat. Malaki. Bandehado ang shape ng UFO. Hindi ko lang masyado makita, madilim ng makita ko ang antenna. Nakita ko lang maliit na ng lamunin ng dagat”

Kung inyong matatandaan, noong Enero 23, 2004 meron ding katulad na phenomenon ang nangyari sa karagatan na tumama sa baybayin ng La Union, kung saan nasa 194 na mga mangingisda sakay ng kani-kanilang mga bangka ang hinampas ng malalaki at malakas na alon at napadpad sila sa mga dalampasigan ng Pangasinan at ang iba ay sa lalawigan ng Ilocos Sur.

Pareho din ang naging paliwanag tungkol dito ng PAG-ASA sa phenomenon na nangyari sa Mindoro na ang malalaking alon ay sanhi ng masamang kalagayan ng panahon na ang eksaktong pagkakasabi ay “north east monsoon na pinalakas pa ng tail end ng cold front na nakaapekto sa naturang lugar.”

Ngayon, hindi ko sinasabing totoo ang nakita ng psychic sa pagbagsak at paglubog ng UFO sa gawing yun ng Mindoro na nagresulta sa malalaking alon ngunit mainam na maging bukas ang ating isipan, at meron naman tayong kalayaan na alamin ang katotohanan tungkol dito lalu na kapag di kayo kumbinsido sa paliwanag ng mga siyentista. #