Telekinesis: Kaya Mo Bang Magpagalaw ng Bagay?

Telekinesis: Kaya Mo Bang Magpagalaw ng Bagay? Rey T. Sibayan November 29, 2005 Hanggang ngayon ay hindi pa rin kumbinsido ang karamihan sa kapangyarihan ng isip ng tao bagaman may mga ebidensiya na tungkol dito tulad ng pagtingin sa lugar na hindi direktang nakikita ng mga mata (remote viewing/clairvoyance), at pagpapagalaw ng bagay (telekinesis/psychokinesis). Sa mga kababayan natin na nagtatanong sa akin kung paano nga ba matuto ng telekinesis, ito na ang inyong inaabangan at ihahayag ko dito ang ilang pamamaraan kung paano ito gawin ngunit hindi ko ginagarantiyahan na lahat kayo ay magagawa ito dahil ito ay nakasalalay din sa inyo – hindi sa pamamaraan na ihahayag ko at hindi rin sa akin. Ang tagumpay ng anumang kapangyarihan ay hindi nakasalalay sa pamamaraan o sinuman ang magtuturo nito kundi iyan ay depende sa inyong kakayanan, pagpupursige at ang pinakamahalaga ay ang inyong paniniwala. Ngunit, bago natin tumbukin ang mga pamamaraan nais ko lamang ibahagi sa inyo ang katotohanan na tayong lahat ay may ganitong kakayanan at hindi sa iilan lamang, bagaman may mga tao na talagang mula pagkabata ay hindi nawala ang kanilang abilidad na gawin ito, gayunman ang iba ay nagawa ito ng di inaasahan tulad ng dahil sa matinding galit. May mga kilalang mga personalidad tulad ni Uri Geller ng Israeli na may kakayanang baluktutin ang kutsara at mga susi sa pamamagitan ng kapangyarihan ng kanyang isip. Gayundin si Nina Kulagina ng Rusya na may kakayanang pagalawin ang mga bagay sa kanyang paligid kapag ito ay natitigan nya tulad ng posporo, bolang kristal, pagpigil sa paggalaw ng clock pendulum at iba pang bagay. Nang dumalo ako minsan sa seminar ni Jimmy Licauco, isang paranormal expert at mind trainer, nagawa naming baluktutin ang kutsara nang hindi mo kailangan gamitan ng lakas, gayundin ang pagpapagalaw ng palito sa isang mangkok ng tubig. May iba naman akong kaibigan na nagsabing nagawa nilang patumbahin ang silya dahil sa matinding galit sa taong nakaupo doon, samantalang ang iba naman ay tinitigan lamang nya ang kanyang cellphone at inutusan itong gumalaw ay bigla itong tumilapon, kaya hayun basag nang bumagsak sa sahig. Ang psychokinesis (PK) o kilala rin sa tawag na telekinesis ay ilang beses na ring pinag-aralan ng mga siyentista, ngunit bagaman ang ilang pagsusuri ay merong magandang resulta, ang iba naman ay nanatiling duda sa ebidensiya kaugnay ng kapangyarihan ng pag-iisip ng tao. Ngayon, di na ako magpapasikut-sikot pa, narito na ang pamamaraan kung paano maaaring paganahin ang isipan sa pagpapagalaw ng anumang bagay, ngunit inuulit ko hindi garantisadong ang mga paraan na sasabihin ko ay mabisa. Maaari kayong magtagumpay sa unang beses bagaman ang iba ay nagawa ito pagkalipas ng ilang beses na pagtatangka. Sa paraan ng pagbaluktot ng kutsara: pumili kayo ng masasabi niyong pinakamakapal na kutsara sa inyong kusina, ngunit siguruhin niyong magpa-alam kayo para naman di kayo pagalitan. Wag niyo akong sisihin kapag napagalitan kayo dahil nais ko lamang ibahagi sa inyo ang paraan ng spoon bending. Kung kanan ang malakas ninyong kamay, hawakan niyo ang pinaka-ulo ng kutsara sa gawing ito at ang hinliliit sa kaliwang kamay niyo ang magtatangkang baluktutin ang hawakan. Bago ito gawin, paganahin ang inyong isip at taimtin na isipin na palambutin ang bahagi ng hawakan malapit sa hinahawakan mong pinaka-ulo ng kutsara. Maaari mo itong himasin ng paulit-ulit habang pinagagana mo ang iyong isip. Isipin mong ang kutsara ay isang tsokolate na kapag nainitan ay natutunaw o di man kaya ay inisip mong nakasalang ito sa apoy at unti unti itong nagbabaga hanggang sa lumalambot. Ngayon kapag buo na ang paniniwala mo sa iyong isipan na malambot na ang hawakan ng kutsara, subukin mong mahinang itulak pababa ng inyong hinliliit ang pinakadulo ng hawakan at diyan mo malalaman na kaya mong paganahin ang telekinesis sa sarili mo. Gayunman, may mga insidente na kusa itong bumabaluktot pababa man o pataas habang hinihimas ang kutsara. Hayaan mo na lamang na kusa siyang bumaluktot dahil yun ay isang napakatibay na ebidensiya ng kapangyarihan ng isip. Ang isang buhay at talagang di matatawaran sa kredibilidad na nagawa nya yan ay walang iba kundi ang iginagalang sa industriya ng broadcasting – si Tiya Dely Magpayo. Ngayon kung di niyo nagawa ang sinabi kong paraan, ay wag kayo mawalan ng pag-asa, tulad ng binabanggit ko, hindi naman maaaring sa isang beses mo lang magagawa ito dahil marami pang pagkakataon – ika nga kasabihan sa wikang ingles: “Constant Practice Makes Perfect” o kaya ay “Try and Try Until You Succeed”. Sulatan niyo ako kung naging matagumpay man kayo o hindi sa binanggit ko dito. Para sa inyong mga katanungan at suhestyun, mangyaring mag-text sa 09206316528/09167931451 o kaya mag-email sa misteryolohika@gmail.com. Bisitahin din ang aking website sa http://misteryolohika.tripod.com. #

Magic: Ilusyon ba o Psychic Ability

Magic: Ilusyon ba o Psychic Ability?
Rey T. Sibayan November 19, 2005

Minsan may nagtanong sa akin kung ang mga magician - mga taong nagpapakita ng mahika para mang-aliw ng tao, ay totoong gumagamit ng abilidad sa kanilang pag-iisip o di kaya ay gumagawa lamang ng pandaraya o magic trick. Ang direktang naging sagot ko dito ay lahat tayo ay may kakayanan sa pag-iisip na gawin ang isang bagay na para sa ibang tao ay imposible. Kailangan lamang na naniniwala ka na kaya mong gawin yun.

Yung paniniwalang yun ang para sa akin ay siyang susi para magawa ang isang "imposibleng" bagay. Sinundan ko pa ang sinabi kong paliwanag na hindi rin natin maaaring itanggi ang katotohanan na ang mga mahikerong ito o stage players ay gumagamit din ng trick para palabasin na totoo ang kanilang ginagawa tulad ng paggamit ng mga props o kagamitan sa kanilang pagpapalabas kabilang na rito ang mga playing card, mga kahon at iba pang instrumento. Kailan nga ba nagsimula ang paggamit ng mahika o pagpapakita nito sa tao?

Ito ay sinasabing nagsimula noong 135 BC sa pamamagitan ng isang mahikerong taga-Syria na si Eunios. Nagawa nitong pigilin ang pag-aalsa ng mga alipin sa Sicily nang magpakita ito ng abilidad na pagbuga ng apoy. Ipinagyabang ng magician na binigyan umano siya ng kapangyrihan ng isang diyosa para hindi masunog sa apoy.

Mula sa panahon na iyon ay naging interesado na ang tao sa pagpapakita ng mahika o magic, na siya namang sinamantala ng ilang tiwaling tao para makapanloko ng tao, bagaman may mga taong totoo namang may kakaibang abilidad na ito na gawin ang imposible. Taong 1782, nang magsimulang gawing libangan ng tao ang pagpapakita ng mahika sa pamamagitan ng magician na si Chevalier Joseph Pinetti, nang gumamit na ito ng ibat-ibang trick o daya para lamang mapasaya ang mga manonood tulad ng pagpapatubo ng isang orange tree sa entablado hanggang sa ito ay mamunga.

Lalu pang tumindi ang paghanga ng tao sa mahika sa ika-18 siglo nang gamitin din ng mga mahikero ang pag-usad ng siyensiya sa kanilang palabas. Si Jean-Eugene Robert Houdin ay gumamit ng electric magnet para lokohin lamang ang mapasuko ang isang rebeldeng sundalo. Si Alexander Hermann na kilala bilang "Hermann the Great" ay gumamit ng mga alagang hayop sa kanyang mga mahika at nagagawa din nito ang pagpapalutang at paglaho ng mga bagay.

Sinundan pa ito ng pagsikat ng iba pang mahikero tulad nina Harry Kellar; T. Nelson Downs, binansagang King of Koins; Howard Thurston, tinaguriang master card manipulator; Harry Houdini, kilala sa kanyang escape technique; David Copperfield, ang naglakad papasok sa Great Wall of China at nagpalaho ng ilang saglit sa Statue of Liberty sa New York. Hanggang sa ngayon ay lalu pang tinatangkilik ang pagpapakita ng mahika ngunit sa mas modernong pamamaraan na tulad ng mga ipinapakita nina David Blaine, Chris Angel at ang sarili nating kababayan na si Eric Mana. Ngunit, ,may mga pagkakataon bang ang pagpapakita ng mahika ay hindi lahat masasabing ilusyon o pandaraya lamang sa mga mata ng manonood, bagkus ay gumagamit ang mga ito ng sarili nilang kapangyarihan sa pag-iisip?

Nang tanungin ko tungkol sa bagay na ito si Jimmy Licauco, kinikilalang paranormal expert sa Pilipinas, inamin nito na ang mga stage at street magician ay may abilidad ang pag-iisip o psychic power na gawin ang mga imposible. Kabilang sa mga karaniwan na nating nakikitang kakayanan nila ay ang pagpapagalaw ng mga bagay (telekinesis), pagpapalutang (levitation), komunikasyon sa isip (telepathy) at pagkakita sa mga espiritu (clairvoyance).

Kapareho din ng pananaw ni Licauco ang obserbasyon ng iba pang psychic tulad nina Cora Guidote ng Inner Mind Association of the Philippines, Daisy at Chito Mercader - kapwa psychic counselor. Ngunit, nang tanungin ko sila kung hindi ba maituturing na pagsasayang lamang ng enerhiya ang ginagawa ng mga mahikero, dahil sa halip na pagtulong sa kapwa ang ginagawa gamit ang kanilang abilidad ay pang-aaliw lamang ang ginagawa ng mga ito.

Bagaman may mga nakita naman akong abilidad na ginawa ni David Blaine na tinulungan niya ang taong ginamitan niya ng kanyang mahika. Ayon kay Martinez, wala tayong karapatan na husgahan kung ano man ang ginagawa ng mga mahikero nakatutulong man ito o hindi sa tao, ngunit ang simpleng pagpapasaya sa tao ay maituturing na ring pagtulong.

Ngunit sa aking pansariling pananaw, mas mainam marahil na ituro ng mga mahikerong ito ang kanilang mga abilidad para makatulong sa tao na magamit ng todo ang kanyang sariling abilidad sa pag-iisip o kaya ay magic tricks para maiangat ang kanilang pamumuhay sa mabuting pamamaraan.

Para sa inyong mga katanungan at suhestyun, mag-text sa 09206316528, mag-email sa misteryolohika@gmail.com , at pwede rin kayo bumisita sa aking sariling website ang http://misteryolohika.tripod.com/.

Pagtuklas sa Inner Earth, Tuloy

Kung ang buong akala natin noon ay nagbibiro lang ang isang grupo ng mga siyentista sa kanilang hangarin na marating ang loob ng ating planeta o tinatawag na Inner Earth, nagkakamali tayo dahil sa nakatakda na ang kanilang biyahe sa Hunyo ng susunod na taon.

Ang pagtuklas sa daigdig sa loob ng ating planeta ay pangungunahan ni Steve Currey, isa sa mga nangungunang river explorer sa buong mundo. Siya ang kauna-unahang sumisid sa kalaliman ng Yangtze River sa China, Brahmaputra at Upper Ganges Rivers sa bansang India, Futaleufu River sa Chile, Katun River sa Siberia at Tsangpo River sa Tibet.

Kasama ni Currey sa "Inner Earth Expedition" ang batikang manunulat at mananaliksik na si Rodney Cluff, may-akda ng aklat na World Top Secret: Our Earth is Hollow. Nagkaroon ng matinding interes sa hollow earth theory si Cluff nang ito ay 16 na taong gulang pa lamang habang ito ay nagta-trabaho noon sa isang sakahan sa New Mexico.

Lalung lumakas ang ganitong paniniwala sa teorya ni Cluff at Currey dahil sa matibay na paniniwala ng mga Eskimo na merong butas sa Arctic Ocean na natukoy sa lokasyon na 84.4 N Latitude, 141 E Longtitude.

Para matuloy ang Inner Earth Expedition sa June 26, 2006, umarkila na si Currey ng isang Russian Nuclear Icebreaker mula sa kumpanyang Adventure Associates, at binuksan ang naturang misyon para sa unang isandaan katao na interesadong makarating sa Inner Earth.

Aalis ang grupo ni Currey mula Murmansk, Russia sa Hunyo 26, 2006 patungong North Pole lulan ng Icebreaker Yamal, isang espesyal na sasakyan na kumpleto sa amenities nito na merong lakas 75, 000 horsepower at ang unang paghimpil nila ay sa mismong geographic North Pole, sa hilagang bahagi ng Franz Josef Land.

Sa Franz Josef Land, sinimulan ng mag-amang Jens at Olaf Jansen ang kanilang paglalayag pahilagang silangan noong July 1, 1829 at dito nila di sinasadyang natuklasan ang pinakapintuan ng North Pole patungo sa Inner Earth.

Agosto ng taong ding yun nang tumambad sa paningin ng mag-amang Jansen ang isang napakagandang lugar at nakita nila ang mga repleksiyon ng araw o planeta na hindi naman gumagalaw. Ilang araw ang lumipas ay nasa dalampasigan na sila ng isang malaking ilog na nagdala pa sa kanila sa pinakaloob ng planeta kung saan umabot ng sampung araw ng paglalakbay at kitang kita ng kanilang mga mata ang kakaibang tanawin, matatayog at ga-higanteng mga punungkahoy na milya milya ang layo sa bawat isa.

Nang sumapit ang Setyembre 1 1829, nakarinig sila ng mga awitin at isang napakalaking sasakyang panghimpapawid ang unti unting bumababa sa kanilang munting bangka at ilang metro ang taas ay tumigil at bumaba ang ilang mala-higanteng mga tao na merong kakaibang salita na hindi maintindihan ng mag-amang Jansen.

Naulit ang pagpasok ng tao sa loob ng Inner Earth sa North Pole noong Pebrero taong 1947 nang matuklasan ng grupo ni Rear Admiral Richard Byrd ng US Navy ang pinakapintuan patungo sa loob ng ating planeta.

Sa kanyang paglipad sa loob ng lagusan sa North Pole, ay namangha siya nang tabihan siya ng mga kakaibang sasakyang panghimpapawid ng mga tagaroon na kitang kita ang mas makabagong teknolohiya kesa sa mga tao sa ibabaw ng planeta.

Sa katunayan kinamayan pa umano siya ng mga malalaking tao sa naturang lugar at nagkaroon ng talastasan. Kitang kita rin umano ni Byrd ang napakaganda at napakalawak na lupain na merong konting yelo o snow, tanawin na hindi pa nakikita ng sinumang tao sa ibabaw ng ating planeta.

Bagaman ganito ang pagkakasalarawan sa nakita ni Byrd, naging tampulan naman ito ng debate sa hanay ng mga manunulat, mga mananaliksik at mga nagdududa sa teorya ng hollow earth.

Kaya ngayon para malinawan na ang anumang agam-agam tungkol sa Inner Earth, ay ang pagtungo nga ng grupo ni Currey sa North Pole sa susunod na taon. Naglaan ang grupo ng 24 na araw para sa naturang pagtuklas sa lagusan patungo sa loob ng ating planeta.

Kung interesado kang sumama sa naturang Hollow Earth Journey, kailangan mo lang magdeposito ng $5000 at saka na bayaran ang kabuuan ng $18,950 hanggang $20,950.

Ayon kay Currey, kapag pinalad silang makita ang lagusan babagtasin na nila ang Hiddekel River patungo sa umanoy lunsod ng Jehu, sakay ng monorail patungong City of Eden para dalawin ang palasyo ng Hari ng Inner Earth, saka pabalik ng City of Jehu palabas ng North Pole lulan ng Yamal.

At kung di naman makita ang lagusan ay diretso sila sa Siberian Islands para tignan ang mga kalansay ng mga kakaibang hayop na nagmula sa loob ng ating planeta.

Kung gusto niyong malaman pa ang iba pang detalye ng misyon na ito patungong Inner Earth, mag-log in sa aking website: http://misteryolohika.tripod.com. Maaari ding mag-text sa 09206316528 o mag-email sa misteryolohika@gmail.com.#

Ebidensiya ng Kabilang Buhay, Nasa Bibliya

Totoo ba ang kabilang buhay o "Afterlife", ang buhay pagkatapos mamatay ang tao sa mundong ito? Para sa mga nagkaroon ng karanasan sa Near-Death o muntikang kamatayan at Astral Travel o Projection, totoong merong kabilang buhay, ngunit sa mga di dumanas ng ganitong hiwaga sa kanilang buhay ay posibleng may pagdududa pa rin kung meron nga bang kabilang buhay. Sa mga taong wala pang karanasan sa mga binanggit kong mga hiwaga na normal namang nangyayari sa pang-araw araw nating buhay, ngunit may paniniwala na ang buhay ng tao ay magtutuluy-tuloy hanggang sa kabilang buhay ay masasabi kong merong bukas na kaisipan at handang tanggapin ang katotohanan kesa sa ibang nanatiling sarado ang paniniwala sa kung ano ang nakagisnang turo mula sa kanilang relihiyon o sektang kinaaniban. Nais kong linawin dito na wala akong tinututulan na relihiyon o anumang sekta dahil sa aking paniniwala na ang lahat ng mga grupong relihiyon o iba pang grupong espiritwal ay may kanya kanyang espesyal na papel sa buhay ng tao depende sa antas ng kaisipan at pananampalataya nito. Sa katunayan nirerespeto ko lahat ng relihiyon dahil sa ito ay sandigan ng pananampalataya ng isang tagasunod at wala akong karapatan na husgahan ang sinuman dito dahil mismong ang Panginoong Diyos nga ay nauunawaan nya ang lahat….lubos nga siyang maunawain at maawain na hindi marunong manghusga. Ngayon kung nais ninyong malaman ang mga kataga sa Bibliya na magpapatunay na meron talagang kabilang buhay at magiging tuluy tuloy ang buhay ng isang tao sa kabilang daigdig pagkatapos nito mamatay sa pisikal, ibabahagi ko sa inyo ang ginawang pananaliksik at pag-aaral tungkol dito ng isang eksperto sa katauhan ni Dave Miller, Ph. D. Sa artikulong sinulat ni Dave Miller, Ph. D. na nailathala sa apologetic press sa world wide web, binanggit nito ang ilang kapitolyo at bersikulo sa Bibliya na magpapatunay na meron talagang kabilang buhay o afterlife, dahilan kung bakit may mga pagkakataon na nagpapakita sa mga taong buhay ang kaluluwa ng mga taong patay. Sinimulan ni Miller ang kanyang paliwanag sa Genesis 2:7 nang lalangin ng Panginoong Diyos ang tao na merong taglay na laman at buto at hinubog mula sa alabok. Ngunit di tulad ng mga hayop, ang isang tao ay merong espiritwal na bahagi o spiritual dimension na nilalang kawangis ng Panginoong Diyos alinsunod sa isinasaad ng Bibliya sa Genesis 1:26-27. Kasunod nito, binanggit ni din ni Miller ang nakasaad sa Zechariah 12:1 na nagsasabing binigyan ng buhay ng Panginoong Diyos ang tao mula sa pagiging sanggol nito kung kaya’t maituturing itong natatanging personalidad na may kakayanang malagpasan din ng matiwasay ang tinatawag na “physical death” at mabuhay ng imortal. Kapag namatay na ang tao, hihiwalay ang espiritu nito mula sa kanyang katawang lupa at mananatili itong buhay kaakibat ang kanyang diwa at kaisipan habang nasa daigdig ng mga espiritu (Genesis 35:18; 1Kings 17:21-22). Nilinaw ni Hill, na binigyang diin ng Bibliya na ang kahulugan ng “kamatayan” ay ang paghihiwalay at hindi tuluyang pagkawala ng isang nilalang, dahil sa ang katawan kapag walang espiritu ay patay (James 2:26), at ang paghihiwalay ng kaluluwa o espiritu mula sa katawang lupa ay maituturing na kamatayan sa pisikal at hindi ng espiritu. Ang isa pang ebidensiya ng kabilang buhay ay mababasa sa Luke 16:19-31, kung saan ang mga kalalakihan na naging tampok dito ay namatay na ngunit tulad ni Lazarus, sinamahan siya ng mga angel patungo sa kabilang buhay. Dagdag pa rito ang nakasaad sa Hebrews 9:27 kung saan binigyan ng Panginoong Diyos ang mamamayan sa mundong ito na ihanda ang kanilang mga kaluluwa para sa walang hanggang buhay. Kapag namatay ang isang tao, ang kanyang katawang lupa ay ililibing sa hukay, habang ang kanyang spiritu ay maglalakbay sa dako pa roon (John 5:28 – 29). Para sa inyong mga katanungan, suhestyun, magtext lang sa 09167931451, mag-email sa paranormalrey@gmail.com o bisitahin ang aking abang website: misteryolohiya.tripod.com kung saan pwede kayo mag-iwan ng inyong comment sa aking questbook.Wag mangingiming ibahagi ang inyong karanasan sa akin. #

Multong Kongresista, Ebidensiya ng Kabilang Buhay

Nais kong ipaliwag sa artikulong ito ang misteryo ng pagdalo sa sesyon ng Kongreso ng isang kinatawan, sa kabila nang katotohanan na ito ay una nang isinugod sa ospital at tuluyan na itong nalagutan ng hininga. Ang tinutukoy ko dito ay ang hiwagang bumalot sa pagdalo ng yumaong si dating Rep. Datu Joseph Sibug, kinatawan ng Cultural Communities noong Nobyembre 1992 sa regular session ng Kongreso, nagpa-check ng attendance, at nakipag-usap pa sa kapwa Kongresista. Hanggang ngayon ay hindi pa rin ito makalimutan ni dating Rep. Vicente Tagle dahil sa siya mismo ang katabi sa upuan at laging ka-kwentuhan ni Sibug lalu na nung araw na yun na ipinakita pa sa kanya ang draft ng privilege speech nito. Ayon kay Tagle, hinding hindi na malilimutan ang naturang karanasan lalu na at hindi lang siya ang nakakita kay Sibug dahil sa nagawa pa nitong batiin din ang iba pang kasamahan nila sa kongreso nang araw na yun. Laking gulat na lamang ng lahat ng malaman nila ang katotohanan na si Sibug ay comatose sa Intensive Care Unit nang kalaunan ay binawian na ng buhay. Ngayon, ano ang hiwagang bumabalot dito bakit nagawa nitong magpakita sa Kongreso nang ang kanyang pisikal na katawan ay nasa ospital at walang malay hanggang sa siya ay mamatay. Ang aking paliwanag dito, yung punto na si Sibug ay comatose sa ospital kahit di pa siya patay ay malaki ang posibilidad na lumabas ang bahagi ng kaluluwa nito sa kanyang katawan at dahil sa masidhing hangarin nito na dumalo sa sesyon ay nagkaroon siya ng napakalakas na astral projection na animoy siya ay solid at pisikal. Ang matindi pa nito dahil sa kanyang malakas na will power, ay nagawa rin niyang makipag-usap ng normal sa kanyang kapwa kongresista lalu na kay Tagle nang hindi alam ng huli na hindi pala pisikal na tao ang kausap nya. Sa pag-aaral na ginawa ng mga eksperto tungkol sa Astral Projection at ebidensiya ng katotohanan tungkol sa kabilang buhay kabilang na ang Near Death Experience, ang bahagi ng ating kaluluwa na kilala sa katagang Astral Body o Spiritual Body ay may kakayanan na dayain ang paningin ng taong makakakita nito. Sa katunayan, sa isang sesyon namin na ginawa sa seminar ni Mr. Jimmy Licauco tungkol sa remote viewing at astral projection, maaaring makita ng ibang tao ang kaluluwa o ang astral body nito. Sa paliwanag ni Licauco tungkol dito may mga pagkakataon na akala mo ay solid na katawan ang tingin ng ibang tao sa astral body, maging ang mga alagang hayop tulad ng aso at pusa ay matindi ang reaksiyon kapag ito ay nakita. Ngayon ang nangyari kay Sibug ay isa ring patunay na may kakayanan ang mga kaluluwa o multo na makipag-usap sa mga buhay at patunay din ito na totoong merong kabilang buhay. Napatunayan na rin ito ng mga siyentista ng University of Arizona sa pangunguna ni Dr. Gary Schwartz na nagsagawa ng masusing pananaliksik na patuloy pa ring buhay ang tao sa pamamagitan ng kaluluwa nito kapag sumakabilang buhay na. Isinalarawan ng mga siyentista ang kabilang buhay o ang daigdig ng mga kaluluwa na “survival of consciousness” na nangangahulugan na ang pisikal na katawan ng tao ay namamatay ngunit nanatiling buhay na buhay ang ating kaluluwa at kamalayan. Meron ding hiwalay na pananaliksik na ginawa ang mga eksperto sa mga taong inooperahan sa ospital, at kitang kita ng mga pasyente habang nakahiwalay sa kanilang katawan kung paano sila palutang lutang sa ere at nakita ang mga itinagong bagay sa loob ng operating room na tanging mga siyentista lamang ang nakakaalam kung ano ang hitsura. Para sa inyong mga karanasan tungkol sa kababalaghan, mga katanungan at suhestyun, mag-text sa 0920-6316528, mag-email sa paranormalrey@gmail.com, o kaya ay sumulat sa inyong lingkod rey sibayan c/o dzrh mbc building, ccp complex pasay city. Pwede rin tignan ang aking website: http://misteryolohika.tripod.com.